DENR mosusi sa Busay
CEBU, Philippines - Mopahigayun og ocular inspection ang Department of Environment and Natural Resources sa sitio Lower Busay diin nahimutang ang Busay Elementary School tungod sa hulga sa landslide.
Ang DENR-7 nakadawat og suwat gikan sa barangay Busay nga naghangyo alang sa re-inspection sa tunghaan ug sa permanente’ng relocation site. Matud sa tigpamaba sa DENR-7, Eddie Llamedo, nga niadto’ng 2011 adunay report ang Mines and Geosciences Bureau nga ang Busay Elementary School anaa sa “high to very high landslide susceptibility rating.”
Pasabot niini ang mao’ng lugar wala girekomendar nga tukuran og permanente’ng istruktura.
Gihimug-atan sa ahensiya nga dili gihapon nila irekomendar isip relocation site ang sitio Huyuhoy tungod kay susama lang sa sitio Lower Busay nga delikado ug ang complex nga gihimo’ng temporaryo’ng tunghaan dili usab luwas.
Gumikan kay wala na man gipagamit ang complex, gibalik sa karaang school building ang klase.
Gisuspenso una og duha ka adlaw ang klase aron makapanglimpyo sa old school site.
Hinuon giklaro sa mga magtutudlo nga dili maapektuhan ang pagtungha sa mga estudyante tungod kay duna sila’y Sabado nga make-up class. (BANAT NEWS)
- Latest
