APEC delegates sugod na’g abot

CEBU, Philippines – Sugod karong adlawa gibutang na sa heightened alert status ang kapulisan sa Metro Cebu tungod sa pag-abot sa unang tulo ka mga delegado nga motambong sa Asia Pacific Economic Cooperation (APEC) Summit nga himuon karong umaabot nga semana.

Kini maoy gitug-an ni Superintendent Marciano Batiancela ang officer in-charge sa Cebu City Police nga nahinabi sa Banat News.

Duha ka adlaw sa dili pa ang adlaw sa pagbukas sa APEC Summit ipatuman ‘sab sa kapulisan sa rehiyon ang full alert status ug i-deploy na ang katunga sa security force sa maong adlaw.

Ang kapulisan sa dakbayan sa Sugbo adunay 500 ka mga polis ang ipakatap sa mga lugar sa palibot sa siyudad, apan adunay mga augmentation force gikan sa Negros, Bohol, Siquijor, Regional Public Safety Battalion-7 ug mga sakop sa Special Action Force (SAF) gikan sa Campo Crame.

Sa seguridad sa kadagatan ang mga sakop sa Philippine Coast Guard ug Philippine Navy na ‘sab ang mopatuman sa pagbantay.

Lakip sa bantayan sa kapulisan ang lugar sama sa Kota Park, Madridejos; Sta. Fe Beach; Malapascua, Daanbantayan; San Franciso, Camotes Island; Basdiot, Moalboal; Matutinao, Badian; Tan-awan, Oslob, ug Osmeña Peak, sa Dalaguete nga posibleng adtuon usab sa mga delegado.

Samtang sa 47 ka mga hotels sa tibuok probinsya butangan og mga polis nga abagan usab og 116 ka mga force multipliers.

Si Senior Superintentent Mariano Natuel Jr. miingon nga gibanabanang mokabat og 1,400 ka mga polis ang ipakatap atol sa maong kalihokan.

Si Lito Maderazo sa local organizing committee sa APEC miawhag sa mga motorista nga likayan ang pag-agi sa ceremonial roads nga maoy agian sa mga delegado aron di mabalda sa traffic ug mabutang sa peligro ang mga delegado.

Ang Cebu maoy mo-host sa Senior Officials Meeting (SOM3). Ang mga technical meeting magsugod na kini karong Agosto 22 hangtud sa Septiyembre 6 ug gilauman nga karong Agosto 20 magsugod pangabot ang mga delegado.

Gilauman nga sobra sa 3,200 ka delegado ang mangabot nganhi sa Sugbo. Si Mayor Michael Rama mimando  sa Cebu City Transportation Office (CCTO) nga sugod Agosto 20 hangtud September 7 way gitugotang maka-leave ug day off.

Samtang ang hepe saPAGASA-Mactan Oscar Tabada miingon nga adunay masinating kusog nga hangin, panugdog ug kilat nga dala sa hanging habagat ug sa Bagyong Ineng apan wala sila’y nakitang posibleng masinating grabeng pagbaha. - Jojo Ugdol, Romeo Limpangog, Brenda Batuto ug Sheriza Mae Uy/EIM) (BANAT NEWS)