Palma midayeg sa taga Carcar

CEBU, Philippines – Gipangulohan ni Cebu Archbishop Jose Palma ang selebrasyon sa ika-40 ka tuig nga kapistahan sa San Roque Parish sa dakbayan sa Carcar nga nagdala sa tema nga “Diha sa Balaang Eukaristiya uban ni Senior San Roque Parokya ug ako, Pamilya ko.”

Ang maong Santos nga Misa gitambongan sa mga kaparian gikan sa nagkadaiyang simbahan, mga opisyal sa dakbayan ug sa barangay, mga layko sa Perellos, Tuyom, Valladolid, ug sa mga dinapit nga bisita.

Atol sa wali sa arsobispo, iyang gipasalamatan ang katawhan tungod kay bisan og apektado ang maong simbahan sa nilabay nga linog, apan karon nindot na kaayo kini tungod sa paningkamot sa katawhan.

Matud pa ni Palma nindot kaayo tan-awon ang simbahan dili tungod lang sa usa ka tawo, kundili tungod sa pagtinabangay sa tanan tungod kay kabahin sila niini pinaagi sa ilang pag-amot bahala og ginagmay basta kinasing-kasing.

Sumala pa ni Palma, kinahanglan himuong sumbanan sa  katawhan ang tulo ka birtud nga naglangkob sa pagtuo, paglaum ug gugma.

Awhag sa arsobispo sa katawhan sa Pertuval nga mas mahuman pa g’yud ang ilang nagpadayon nga retro-fitting sa simbahan uban gihapon sa pagtabang sa katawhan.

Human sa misa gipahigayon gilayon sa Arsobispo ang pagbendisyon sa tanang mga bata nga nitambong sa santos nga misa.

Si Fr. Ver Pedrano ang kura paruko mapasalamaton sa katawhan ilabi na kadtong padayon nga nitabang alang sa kahumanan sa ilang mga proyekto.(BANAT NEWS)