Gibuk-an sa ulo atubangan sa kapuyo

CEBU, Philippines – Atubangan sa iyang ka live-in partner gibuk-an sa iyang ulo ang usa ka 25- anyos nga lalaki sa usa ka lalaki diha sa B. Aranas Street, Brgy. San Nicolas Proper ning dakbayan sa Sugbo kagahapon sa buntag.

Giila ang biktima nga si Ariel Capul, traysikad drayber ug nagpuyo sa maong lugar.

Matud pa ni Police Officer 2 Rommel Bancog, imbestigador sa Homicide Section sa Cebu City Police Office nga nahinabi sa Banat News, gikan sa Duljo-Fatima ang biktima sakay sa iyang traysikad.

Nasugatan niini ang iyang kapuyo nga si Ronalyn Gomez, 25, nga nangita kaniya ug nangutana kung asa kini gikan kay wa kini nauli sukad pa sa miaging gabii.

Apan wa motuo si Gomez sa pasangil sa kapuyo ug miinsister kini nga magkuyog silang duha ngadto sa balay sa ginikanan sa lalaki.

Apan sa wala pa sila nakapalayo sa dapit, usa ka motorsiklo ang naabot ug mipusil sa biktima igo sa dughan hinungdan sa pagkatagak niini sa bisekleta.

Ang lalaki nag-angkas sa motor, miduol  sa biktima ug gitiwasan kini sa pagpusil sa iyang ulo sa makadaghan nga higayon.

Sumala pa ni Bancog nga samtang gihimo kadto sa gunman nagsige og hangyo ang kapuyo sa biktima nga dili na kini tiwasan apan wala panumbalinga sa mamumuno ang hangyo.

Sigun pa ni Bancog nga wala nagtabon sa nawong ang gunman, apan dili pa makahatag og saktong impormasyon si Gomez kay dili pa kini maka-estorya kanila og tarong.

Nagduda si Bancog nga dunay nakabikil si Capul sa Duljo-Fatima ug gisundan kini hangtod gibirahan patay.

“Dako siguro ning sala niya kay gisiguro man g’yud sa gunman nga mapatay ang victim,” matud pa ni Bancog.

Unom ka bala sa .380 kalibre, upat ka basiyo ug usa ka slug ang narekober sa kapulisan sa crime scene nga gituohang maoy gigamit sa gunman. – /EIM) (BANAT NEWS)