Duha nasampak sa trak

CEBU, Philippines – Duha ka mga tawo ang namatay, human ang gisakyan nilang motor nabangga ngadto sa usa ka  trak  nga naghunong daplin sa dalan sa may Sitio Kamagayan, Barangay Perellos sa Dakbayan sa Carcar.

Ang namatay naila nga sila Glen Cingco, 23,  taga Brgy. Liboron, ug Rose Glyn Alcoseba, 21, taga Poblacion Uno sa mao gihapong dakbayan.

Samtang ang driver sa maong trak de karga mao si Villa Perfecto Epus, 57, taga Kadawinan,  Dumaguete City.

Matud pa ni Police Officer 1 Ariel Yap, gikan sa dakbayan sa Sugbo ang mga biktima sakay sa motor  sa dihang pag-abot sa lugar kalit kining nibangga sa maong trak nga niadtong tungora naghunong sa lugar.

Gituohang wala mabantayi sa mga biktima ang maong trak kay wala man kini nagbutang og early warning device ug ang gihunongan niini dili kini layo sa kurbada sa dalan.

Sumala pa ni Yap, dali pa unta gidala sa tambalanan sa Carcar Provincial Hospital ang mga biktima apan gideklarar sila ni Dr. Reo Delaña nga patay gumikan sa mga kadaot nga ilang naangkon sa kalawasan.

Ang driver nga si Epus, nagtingkagol na karon sa karsel sa Carcar Police ug gipaabot ang pagpasang-at og tukma nga kaso.

Nangangkon ang driver nga duna siyay EWD apan ang kapulisan sa Carcar nga maoy niresponde nibutyag nga wala silay nakita nga adunay gibutang niini ang maong driver.

Sa pagsubay sa Banat News sa nahitaboan nagpabilin pa sa lugar ang sakyanan ug ang duha ka krus nga kahoy ug kandila nga gibutang sa mga tawo. – /EIM) (BANAT NEWS)