Pagpangibot sa kahoy sa Mabolo paspasan

CEBU, Philippines – Gibutyag sa pangulo sa Cebu City Transportation Office nga nagkasinabot na sila ug ang kadagkoan Movement for Livable Cebu kabahin sa pagtangtang sa mga kahoy nga anaa sa taliwala sa Pope John Paul II Avenue sa Barangay Mabolo.

Matud ni Atty. Rey Gealon nga kanunay ang ilang panagsabot tali sa kadagkoan sa MLC aron malikayan ang panagsungi kabahin sa pagpatuman sa kamandoan ni Mayor Michael Rama. Sumala pa ni Gealon nga nagkauyon sila nga makaayo sa siyudad ang pagtangtang sa ubang center island nga anaa sa Pope John Paul II Avenue (kanhi San Jose dela Montaña) ug ang pagbalhin sa mga kahoy ngadto sa North Reclamation Area.

Kun may Go Signal na gikan sa Parks and Playgrounds Commission sa dakbayan sa Sugbo para sa pag-ibot sa mga kahoy, sila sa CCTO andam nga mohatag og ayuda sa pagdestino og mga traffic personel sa lugar aron malikayan ang problema sa trapiko.

Ang ubang maibot nga kahoy adto kini balhinon sa mga aseras nga lapad nga dili makahasol sa mga lumalabay.

Nagtuo si Gealon nga sa dili pa magsugod ang Asia Pacific Economic Cooperation (APEC) Summit dinhi sa Sugbo karong Agosto 24 mahuman na ang mao nga gimbuhaton.

Si Mayor Rama gusto g’yud nga makuha ang center island apil ang mga kahoy nga gipatubo taliwala sa karsada aron nga makapaluag kini sa karsada ug mahapsay ang pag-agi sa mga delegado sa APEC Summit. – /RUB) (BANAT NEWS)