Magsuon nag-unay

CEBU, Philippines – Kritikal ang kahimtang sa usa ka 42 anyos nga lalaki human kini dunggaba sa iyang half brother samtang sila nag-inom diha sa ilang balay sa Brgy. Babag 2 ning dakbayan sa Sugbo pasado alas 2 kagahapon sa hapon.

Ang biktima mao si Enrico Zaguire, samtang ang suspetsado naila nga si Horace Montallano, 29, construction worker nga parehos nga nagpuyo sa maong dapit.

Si Senior Police Officer 4 Rey Cuyos ang imbestigador sa homicide section sa Cebu City Police Office nga nahinabi sa Banat News miingon nga nag-inom ang duha sulod sa ilang balay diin ang suspetsado gisugo sa iyang magulang nga magpalit og pan.

Pag-abot sa suspetsado dala ang pan miingon kini sa iyang magulang nga “Hala kaon diha taman sa imong mahurot” ug misunod na ang panaglalis sa duha ug mitumaw ang away.

Ang magulang mikuha sa basiyo sa botilya nga iyang gibuak nga iyang gihimo nga hinagiban samtang ang suspetsado nagbitbit sab og kutsilyo gikan sa kusina. Atol sa hinamagay sa duha gihansakan sa manghod ang dughan sa iyang magulang ug wala g’yud nakabalos ang biktima sa pagdunggab.

Dali nga gidala sa usa ka pribadong tambalanan ang biktima nga naglisod o kritikal ang kahimtang.

Human sa hitabo bulontaryo sab nga mitahan sa Mabolo Police Station ang suspetsado. – /EIM) (BANAT NEWS)