MCWD gisaway sa Coop

CEBU, Philippines - Supak ang Langub Kalunasan Multi-Purpose Cooperative sa pagsulod sa Metropolitan Cebu Water District (MCWD) isip kompetensiya sa pagsuplay og tubig sa lugar.

Atol sa public consultation sa MCWD’s Water Augmentation kagahapon sa barangay hall sa Kalunasan, gihulagway ni Engr. Antonio Canoy, chairman sa LKMPC, nga gimonopoliya sa MCWD ang negosyo sa tubig.

Apan ang mga residente nalipay sa pagsulod sa MCWD aron matabangan ang kalisud sa suplay sa tubig.

Giklaro ni Canoy nga wala sila nahulga sa presensya sa MCWD apan buot lang niini nga maklaro nga dili maapektuhan ang serbisyo sa kooperatiba.

Buot sab unta si Canoy nga sila sa LKMPC na lang ang mobaligya sa tubig sa MCWD ngadto sa mga konsumedor diin mas dali pa ang pagkolekta sa bayad.

Si Engr. Ernie Dilco, acting general manager sa MCWD, namahayag nga temporary lang ang ilang water pump sa Kalunasan nga may gikusgon nga 20 horse power sanglit may itukod sila nga dam sa Nivel Hills, Apas nga mosuplay sa tubig sa uptown areas.

Gipasalig sab ni Dilco nga modawat ang MCWD og application pinaagi sa barangay sukwahi sa reklamo nga hasol ang pagpakonektar og tubig.  (BANAT NEWS)