Rally atol sa APEC
CEBU, Philippines - Ipadayun sa mga kawani sa KEPCO ang ilang strike kung wala’y kasabutan nga makab-ot sa mediation meeting karong Lunes sa National Conciliation and Mediation Board.
Matud ni Lowell Sanchez, ang KEPCO supervisor, nga wala sila’y tuyo sa pagtumong sa welga sa nagsingabot nga Asia-Pacific Economic Cooperation (APEC) Meeting sa Sugbo.
Hayan may adlaw sa welga nga madungan sa pagbukas sa APEC Meeting ug masinati ang problema sa kuryente.
Si Jose Tomongha nibutyag nga ang welga usa ka mensahe ngadto sa tanang kanasuran sa pagtahud sa labor laws.
Matud ni Teody Navea sa BMP-Sanlakas nga duna sila’y himuong welga sa lugar nga diin adunay ministerial meeting aron mapakita ang ila’ng mga kasagmuyo.
Samtang halos kompleto na ang pagpangandam sa APEC Meeting sumala pa ni Ambassador Marciano Paynor Jr., APEC director-general sa National Organizing Committee.
Matud ni Paynor nga gihingpit na nila ang pagpangandam ilabi sa security ug ang problema sa trapiko.
Apil sa pagpangandam ang disaster preparedness, power supply ug ang pagbaha sa kadalanan kung mobundak ang kusog nga uwan.
Lakip sa giandam ang 6x6 truck sa Philippine Army nga masakyan sa mga delegado kung may baha.
Ang pagdeklara og holiday o pagsuspenso sa klase gitugyan usab ngadto sa lokal nga kagamhanan ug sa Department of Education.
Apan matud ni Paynor nga kung madumala lang ang dagan sa trapiko atol sa APEC Meeting, dili na angayang suspensuhon ang klase. (BANAT NEWS)
- Latest
