Gikondenar sa IBP

CEBU, Philippines - Si Atty. Elaine Bathan, suod nga higala sa mga biktima miingon nga namugnaw siya  pagkasayod nga duna na say laing abogado ang nabiktima sa pagpamanhig. Uwahing dunay abogado sa Sugbo nga gipatay mao si Atty. Noel Archival duha ka tuig na ang nilabay.

Isip governor sa Integrated Bar of the Philippines Eastern Visayas ug kanhi presidente sa IBP-Cebu City Chapter hugtanon nilang gikondenar ang brutal nga pagpatay kang Alegre.

Ilang giawhag ang kapulisan nga paspasan ang imbestigasyon ug siguraduhong mataral sa hukmanan ang mga nagpaluyo niini.

“Di ta katuo nga yet again, there is another attack to a fellow lawyer. Whatever is unsay motive nila it will never justify the act, nobody has the right to take the life of any person in that manner,” matud ni Bathan. Si Bathan miingon nga uyon siya nga magbaton og armas ang mga abogado apan kun ingon niini ang klase nga pagpangatake kanila di sila makahigayon pagpanalipod sa ilang kaugalingon.

Giawhag ni Bathan ang publiko nga sabton ang ilang trabaho isip usa ka manlalaban ug tigpanalipod sa ilang mga kliyente ug sama sa uban duna usab silay katungod nga mabuhi.

Si Mandaue City Vice Mayor Glenn Bercede naglaraw mopasar og resolusyon kalabot sa pag-estrikto sa mga magmotorsiklo nga magsul-ob og full-faced helmets ug mandoan ang kapolisan pagbutang og polis sa matag eskina.

Ang presidente sa Integrated Bar of the Philippines (IBP) sa Cebu Province Chapter, Atty. Gonzalo Malig-on miawhag usab sa kapolisan nga madakpan hasta ang mastermind sa maong krimen. (Decemay Padilla, Romeo Limpangog ug Jojo Ugdol ug Brenda D. Batuto/EIM)(BANAT NEWS)