Gullas-Mar tarp gilangkat

CEBU, Philippines - Mitumaw ang tensiyon tali sa mga supporters sa Liberal Party ug Alayon sa dakbayan sa Talisay niadtong adlaw'ng Miyerkules gumikan lang sa tarpaulin.

Kini human nga gipatangtang sa igsuon ni Mayor Johnny Delos Reyes nga si Jim Delos Reyes, pangu sa City Environment and Natural Resources Office (CENRO) ang tarpaulin atubangan sa City Hall nga dunay hulagway ni DILG Secretary Mar Roxas ug 1st District Congressman Gerald “Samsam” Gullas.

Matud ni ABC President ug Bulacao Barangay Captain Raul Cabañero nga ang igsuon sa mayor nipatangtang sa maong tarpaulin nga gitaod alang unta sa pagabi-abi sa DILG Secretary.

Wala matago ni Cabañero ang iyang kadismaya apan kini mitataw nga hayan miscommunication lang ang nahitabo human giingong wala mananghid ang ilang kampo sa pagtaod niini. Si Atty. Alfredo Sipalay, Legal Officer sa dakbayan miangkon nga walay balaod nga nalapas  ang Alayon sa pagtaod sa maong tarpaulin.

Apan giduphan dayon sa mayor ang gibuhat sa iyang igsuon, matud niya aduna nay susamang mga tarpaulin nga gitaod sa mga opisina nila ni Cabañero ug ni Konsehal Richard Aznar.

Matud niya dili siya gustong isipon nga usa ka political rally ang pagduaw ni Roxas sa dakbayan. Samtang si Gullas pagkahibawo sa insidente wala ra mohatag og gibug-aton sa gibuhat sa igsuon sa mayor.  (BANAT NEWS)