10 bata naluwas sa cyberporn
CEBU, Philippines - Tulo ka mga babaye ang gidakop sa mga sakop sa National Bureau of Investigation-7 atol sa gipahigayon nga sagunson nga ronda sa mga gidudahang cybersex den sa duha ka barangay sa dakbayan sa Lapu-Lapu kagahapon sa buntag.
Napulo ka mga bata ang nasalbar sa mga otoridad sa maong operasyon ug gikostudiya na sa Department of Social Welfare and Development.
Ang mga nasikop mao si Jeramie Paquibot, 25, Editha Aying, 49, pulos residente sa Sitio Soong 1, Brgy. Mactan ug si Grace Ybañez, taga Sitio Timpolok, Brgy. Babag.
Kauban sa NBI-7 ang mga sakop sa International Justice Mission kon IJM , usa ka non-governmental organization nga nagtutok sa kampanya batok sa human trafficking ug cyber-pornography.
Ang NBI ug IJM nakadawat og impormasyon kabahin sa usa ka Irish national nga gihinganlan og "Patrick" nga nadakpan sa kapolisan didto sa London sa United Kingdom tungod sa pagkalambigit niini sa cyberpornography nga na-trace diha sa Lapu-Lapu City.
Matud ni Assistant Regional Director Augusto Eric Isidoro sa NBI-7, nakarelasyon tanan sa maong Irish national ang tulo ka babayeng suspek sa nanglabay nga mga tuig. Sumala pa nga na-trace sa computers nga nakuha sa NBI gikan sa mga suspek pinaagi sa IP address o Internet Protocol niini nga gigamit kini sa maong ilegal nga kalihokan, base kini sa tulo ka buwan nilang surveillance.
Nakumpiska sa NBI ang mga laptops, mga keyboards ug mouse ilabi na ang resibo gikan sa money transfers nga gituohang bayad sa maong ilegal nga kalihokan. Sa laing bahin, gihangop ni City Mayor Paz Radaza ang kalamposan sa NBI ug miangkon siyang lisod g’yud alang kanila nga mabantayan ang tanang dautang kalihokan sa siyudad.
"It's a welcome thing nga dunay agencies nagtutok ani. Hinuon, lisud ang monitoring, naa man gyud sila'y gamit. Nindot man g’yud nang nga ing-ana. In addition to it, duna ‘sab silay nabuhat nga nakaayo og samot. Amo silang gi-encourage, there are still some na wala pa namo ma-cover kay duna silay expertise ‘sab," tataw ni Radaza sa mga tigbalita kagahapon. (BANAT NEWS)
- Latest
