Sen. Poe gidepensahan

CEBU, Philippines - Layo pa gani kaayo ang 2016 lokal ug national elections apan ang kawa sa politika dinhi sa Pilipinas nagsugod na og bukal, wala makalingkawas niini ang usa sa mga init kaayo karong posibleng kandidato nga si Senador Grace Poe.

Si Poe gidungog nga modagan sa pagka presidente sa Pilipinas hinungdan gikwestiyon karon ang iyang citizenship ug residency.

Apan usa ka inilang abogado ang nanalipod kang Poe labot sa mga isyu nga gibato ngadto sa senadora. Si Atty. Katrina Legarda, pangulo sa Child Protection Network Foundation midepensa kang Poe labot sa disqualification case batok niya nga gi-file sa Senate Electoral Tribunal.

Kahinumduman, niadtong miaging semana, si Rizalito David sa Partidong Kapatiran misang-at og petisyon batok kang Poe sa Senate Electoral Tribunal diin iyang gikwestiyon ang citizenship ug residency sa senadora. Si David una nang midagan sa pagka-senador niadtong 2013 elections apan naparot kini.

Gibutyag ni Legarda dili mahimong kwestiyunon ang citizenship ni Poe tungod kay usa man kini ka natural born-Filipino bisan og sinagop lang siya ni anhing Fernando Poe Jr. ug asawa niini nga si Susan Roces. Nasayran nga nakit-an si Poe sa magtiayong artista sa Jaro Cathedral sa siyudad sa Iloilo niadtong tuig 1968. Gitataw sa abogada nga bisan dual citizen si Poe kaniadto tungod sa  pagminyo niini sa usa ka Amerkano wala kini makaapektar sa iyang estado isip usa ka Filipino.

Gawas pa niini, hingpit nang gisalikway ni Poe ang iyang pagka-American citizen sa dihang midagan kini pagka-senador.

Nagduda si Legarda, nga may bulok politika kining pag-atake kang Poe. (BANAT NEWS)