Ombuds uyon CICC ayuhon

CEBU, Philippines – Nitugot na ang buhatan sa Ombudsman-Visayas sa pagpaayo sa Cebu International Convention Center (CICC).

Matud ni Deputy Ombudsman for the Visayas, Paul Elmer Clemente, dili sila mobabag sa himuon sa CICC ilabi na kung makaayo sa katawhan.

Hinuon si Clemente niawhag kang Gob. Hilario Davide III nga sa dili pa ayuhon, kinahanglan ang joint team sa Ombudsman ug Kapitolyo mopahigayun una og ocular inspection aron masusi ang technical ug engineering aspects sa proyekto ug mahimoan og dokumento.

Ang Department of Trade and Industry (DTI) ang gitahasan sa Malakanyang sa pag-atiman sa CICC aron mahimo’ng exhibition center.

Niadto’ng Hulyo 6, 2015 nananghid si Davide sa Ombudsman nunot sa plano sa DTI sanglit ang proyekto ebidensiya sa  kaso’ng gipasaka batok sa kanhi gobernador, Kongresista Gwendolyn Garcia.

Si Garcia nisaway kang Davide nga gipasagdan ang CICC diha’ng kini nilingkod sa katungdanan hangtud naguba sa linog ug bagyo.

Matud ni Davide nga kontrobersiyal ang mao’ng proyekto ug giusik-usikan ni Garcia ang kwarta sa katawhan sa pagpatukod sa CICC. – /GMR) (BANAT NEWS)