Duha ka ambush konektado

CEBU, Philippines – Nagduda ang kapolisan sa dakbayan sa Talisay nga ang gipusil patay nga si Arnel Gomez alyas Budlat ang usa sa suspek sa ambush sa Lawaan 1 sa niagi’ng semana.

Matud ni Superintendent Germano Mallari, hepe sa kapolisan sa dakbayan sa Talisay nga aduna sila’y nadawat nga report apan ila pa’ng susihon.

Si Budlat giingong sakop sa grupo’ng gun-for-hire ug gituohan nga giresbakan sa mga kauban sa iya’ng gibiktima.

Samtang drugas ang nakita nga motibo sa kapolisan sa ambush sa dakbayan sa Talisay.

Kini ang gibutyag ni Senior Supt. Noel Gillamac, direktor sa Cebu Provincial Police Office, human sa command conference niadto’ng Lunes kauban ang hepe sa Talisay.

Matud ni Gillamac nga ang ambush sa Talisay ug dakbayan sa Sugbo nga gikalambigitan sa usa ka polis adunay koneksyon sa usa’g-usa lakip na ang pagpatay kang Budlat sa Pasil.

“So, initially sa ato’ng pakighinabi sa chief of police mogawas gyud ning possible rivalry sa mga negosyo especially kini’ng ginadili’ng drugas,” matud ni Gillamac.

Samtang ang hepe sa City Intelligence Branch (CIB) sa Cebu City Police Office, Supt. Romeo Santander, nga nahinabi sa Banat News nikompirmar sa pamahayag sa direktor sa CPPO.

Si Santander niingon nga adunay koneksiyon ang duha ka ambush ug sa pagpatay ni Budlat diin drugas  ang  posible’ng hinungdan.

Apan si Santander niingon nga wala nagpasabot nga si Budlat sab ang responsable sa duha ka ambush.

Usa sa gisubay sa kapolisan kung kinsa pa ang laing suspek nunot sa pagtuo ni Gillamac nga dili lang si Budlat ang nihimo sa krimen. – /GMR) (BANAT NEWS)