Rama mohangyo sa mga hotels
CEBU, Philippines – Moapelar si Cebu City Mayor Michael Rama sa mga tag-iya ug mga nagdumala sa mga hotels sa siyudad nga di magpatuyang pasaka sa ilang rates alang sa mga manambong sa Asia-Pacific Economic Cooperation Summit karong buwana.
Nakaabot kang Rama ang impormasyon kalabot sa reklamo sa mga delegado tungod sa grabeng pagpamahal sa mga hotel room rates sa Cebu.
Sa media briefing niadtong Agosto 7, si Foreign Affairs Undersecretary for International Economic Relations Laura del Rosario, pangulo sa APEC senior official’s meeting mibutyag sa maong reklamo sa mga delegado.
Matud pa nga adunay hotel room nga gi-publish sa online nga matag kwarto sa hotel nagkantidad og P5,800 niadtong Agosto 5 ning tuiga, apan nisaka karong panahona hangtod ngadto sa P13,350.
Magsugod ang maong kalihokan karong Agosto 22 hangtud Septiyembre.
Ang mga hotels nga adtoan sa mga delegado nga naa sa siyudad sa Sugbo mao ang Radisson Blu Hotel, Marco Polo Hotel, ug sa Waterfront Cebu City Hotel & Casino.
Matud ni Rama nga mopatawag siya og meeting karong adlawa sa Hotel and Restaurant Association of Cebu aron moapilar kanila susama sa iyang buhaton sa dili pa moabot ang Sinulog kada Enero.
Sigon pa niya kinahanglang dili ingon ani ang buhaton sa mga hotels apan gusto niyang paminawon unsay ilang rason nganong ingon man niini kadako ang ilang pagpaburot sa presyo. – /EIM) (BANAT NEWS)
- Latest
