Japanese investors giagni ni Davide

CEBU, Philippines - Giagni ni Gobernador Hilario Davide III ang mga magpapatigayun sa Japan alang sa public-private partnership sa mga proyekto sa probinsiya sa Sugbo.

Kini atol sa iya’ng pagtambong sa 10th International Forum on Public-Private Partnership (PPP) sa Tokyo, Japan sa niagi’ng semana.

Ang Toyo University pinaagi sa Asia Public Private Partnership Institute (APPPI) ang host sa forum kinsa si kanhi Malaysian Prime Minister Mahathir bin Mohamad ang nitambong usab.

Si Davide nipahibawo nga ang ekonomiya sa Sugbo mauswagon ug daghang skilled workers sa probinsiya.

Matud ni Davide nga “affordable” ang gasto sa pagnegosyo sa Sugbo ug ang lugar tourist destination.

Usa sa nagkinahanglan sa PPP sumala pa ni Davide ang pagpadagan sa 16 ka district hospitals aron makahatag og maayo’ng serbisyo sa panglawas, ma-upgrade ang mga pasilidad ug ekipo sa tambalanan sama sa X-ray machines, higdaanan ug mobile clinics.

May plano na ang mga Japanese investors sa nilabay’ng tuig sama sa pagpakig-partner sa mga hospitals sa Sugbo ug medical schools aron matubag ang mga training nga gikinahanglan.

Lakip sa buot mapaubos sa PPP ang Cebu South Bus Terminal diin girekomendar sa team sa Toyo University nga himuong mixed-use development diin ang ubos nga bahin bus terminal, ang sunod andana shopping mall ug hotel o condominium sa taas.

Niadto’ng buwan sa Pebrero, ang Toyo University nipadala og team sa Sugbo nga nagtuon sa posible’ng PPP projects nunot sa hangyo ni Davide.

Ang pagtuon nagsentro sa key development areas nga naglangkub sa land use, disaster preparedness, health ug urban infrastructure.  (BANAT NEWS)