Duha naghunos sa ilang kinabuhi

CEBU, Philippines - Duha ka tawo ang naghikog sa dakbayan sa Toledo ug sa dakbayan sa Lapu-Lapu sa managlahing rason.

Napalgang nagbitay sa punoan sa buongon ug wa nay kinabuhi si Edzel Bustillo, 27,  taga Brgy. Don Andres Soriano (DAS) sa maong dakbayan.

Ang silingan niini nga si Laurito Martinez maoy nakakita nga nagbitay na ang biktima sa punoan sa kahoy. Base sa imbestigasyon sa kapulisan nga paingon nga manglimpiyo si Martinez sa tangkal sa iyang baboy dili layo sa punoan sa buongon, maong dali niyang nakita ang nagbitay na nga si Bustillo.

Gidala pa kini sa Carmen Copper Corporation Hospital apan gideklarar kini nga dead on arrival sa nag-atiman nga doktor.

Nasuta sa mga polis nga nangluod si Bustillo sa kapuyo human sila naglalis.

Samtang naghikog usab ang usa ka Gerald Jay Añas, 22, human gikasab-an sa iyahang iyaan diha sa Purok Kalachuchi, Brgy. Looc dakbayan sa Lapu-Lapu sa miaging Martes sa gabii.

Gidala sa Lapu-Lapu City District Hospital si Añas apan gideklarar kining dead on arrival.

Sa inisyal nga pakisusi ni Police Officer 3 Luisito Ernie sa Lapu-Lapu City Police Office-Homicide Section, si Añas gikatahong nakasab-an apan wa pa matino kun ngano.

Ang 12-anyos nga ig-agaw sa namatay maoy nakadiskubri niini nga nagbitay na gikan sa kisame ug nagbilin kini og suicide note nga nangayo’g pasaylo sa iyaan tungod sa iyang pagkabadlungon.(Raymond Abarcas ug Christell Fatima Tudtud/EIM)(BANAT NEWS)