Kiha batok 10 ka konsehal gitun-an
CEBU, Philippines - Gitun-an pa sa mga abogado sa Cebu City Hall ang pagpasaka og kaso batok sa napulo ka konsehal nga nibabag sa pagdawat sa halin sa South Road Properties (SRP).
Matud ni Atty. Jose Daluz nga kriminal ang gibuhat sa 10 ka konsehal sa pagbabag sa pagdawat sa P6.75 bilyones gikan sa highest bidder nga nakapalit sa 45.2 ektarya’ng luna sa SRP.
Sa 10-3 nga boto, mayoriya niini mga sakop sa Bando-Osmeña Pundok Kauswagan (BOPK).
Ang 10 ka konsehal mao sila si Konsehal Sisinio Andales, Margarita Osmeña, Alvin Dizon, Roberto Cabarrubias, Nida Cabrera, Lea Japson, Nestor Archival, Alvin Arcilla ug sakop sa Team Rama nga si Mary Ann Delos Santos.
Samtang ang nisupak sa resolusyon nga giduso ni Andales mao sila si Konsehal Gerardo Carillo, Noel Wenceslao ug Nendell Hanz Abella.
Wala motunga sa sesyon sila si Konsehal David Tumulak, Richard Osmeña, James Anthony Cuenco ug ABC president Philip Zafra.
Matud ni Wenceslao nga nakita nila nga pamolitika ang pagbabag sa 10 ka konsehal tungod sa umaabot eleksiyon sunod tuig nga unta ang pagtabang ug kaayuhan sa siyudad ang tan-awon.
Ang SM Prime Holdings ug ang Filinvest Land Inc. ang nidaug isip highest bidder sa pagpalit sa duha ka luna sa SRP. (Sheriza Mae R. Uy/GMR)(BANAT NEWS)
- Latest
