Mananga Bridge peligrong mahugno

CEBU, Philippines - Mipasidaan ang maintenance section sa DPWH 2nd District Engineering Office nga peligrong mahugno ang Mananga Bridge sa dakbayan sa Talisay kun di hunongon ang ilegal nga pag-quarry sa sapa niini.

Gikoral na sa DPWH ang lugar nga agianan sa mga dagkong trak diha sa Lawaan 3 niadto pang buwan sa Marso ning tuiga.

Apan matud pa ni Engr. Roy Alviso sa Maintenance Section sa DPWH 2nd  Engineering District gitugot ni Mayor Johnny Delos Reyes nga mangubkob ang mga residente sa lugar.

Nasuta nga ilaha kining hakuton ug ibaligya sa mga mamalitay nga magdala og trak sa lugar.

Nanawagan sila karon sa mayor nga did-an na g’yud ang si bisan kinsa nga mangubkob sa Mananga.

Usa sa mga residente ilawom sa Mananga Bridge nga si Semproso Velasco, miangkon nga nahadlok siya nga banlason sa sapa tungod kay nagkaanam og kalawom ang sapa tungod sa pagsige og kubkob sa balas ug graba.

Ang tigpamaba sa Department of Environment and Natural Resources (DENR) sa Central Visayas nga si Eddie Llamedo, miingon, usa ka kilometro gikan sa mga taytayan sa ubos ug sa ibabaw nga bahin niini gidili ang pagpangubkob. Sumala pa niya, subay sa Local Government Code 7160 ang mga mayor ug brgy kapitan makapahunong niini.

Giklaro usab niya nga  wa silay giisyu nga quarry ug mining permit diha sa Mananga kay dunay bahin niini nga nasulod sa Central Cebu Protected Landscape(CCPL).  (BANAT NEWS)