Hot spots tutokan sa PNP

CEBU, Philippines - Pipila ka adlaw sa dili pa magsugod ang APEC Summit duna’y mga lugar nga tagaan og pagtagad sa kapulisan sa dakbayan sa Sugbo tungod kay taas kaayo ang talaan sa mga krimen sa maong mga dapit.

Kini gilangkuban sa downtown area sa siyudad nga naa sa pagbantay sa Carbon Police, Mango Square sa Fuente Police, mga malls sakop sa Mabolo Police Station, Blessed Sacrament sa Brgy. Tejero ug Brgy. Duljo Fatima.

Si Senior Superintendent Marciano Batiancela ang officer in-charge sa Cebu City Police Office mibutyag nga ang naasoy nga mga lugar dunay daghang mga nanghitabong krimen.

Ang deputy chief for operations sa Police Regional Office-7, Sr. Supt. Valfre Tabian miingon nga positibo ang resulta sa pag-deploy sa kadaghanan sa kapolisan diha sa kadalanan.

Matud niya, nikunhod ang mga krimen dinhi sa Sugbo kun itandi sa nanglabay nga mga bulan dihang wala pa ang kamanduan ni Police PNP Chief Ricardo Marquez. Hinoon sa datos sa kapulisan misaka ang kaso sa “theft” nga usa karon sa tagaan og pagtagad sa mga otoridad. (BANAT NEWS)