Multicabs gipanghatag sa Kapitolyo

CEBU, Philippines – Giapod-apod kagahapon sa Kapitolyo ang 39 ka multicabs ngadto sa kalungsuran ug kabarangayan sa probinsiya.

Nikabat sa P5.1 milyones ang budget sa Kapitolyo alang sa pagpamalit sa nahisgutang mga sakyanan.

Ang matag multicab full tank sa gasolina nga gidala sa mga mayor ug mga barangay kapitan nga nakadawat niini.

Si Bise Gobernador Agnes Magpale, ang acting governor karon, nagkanayun nga ang mao’ng mga multicabs daku og tabang sa kabarangayan ilabi na sa mga bukirang barangay sa mga importante’ng lakaw o ba kaha sa emerhensiya.

Gawas sa mga multicabs gikatakda usab unya ang pag-apod-apod sa mga ambulansiya.

Matud ni Magpale nga ang pagpanghatag sa ambulansiya sa kalungsuran ug kabarangayan mao ang ikatulo na nga hugna.

Gibutyag ni Magpale nga ang mga kapitan ug mayor ang nanghangyo nga mahatagan sila og mga sakyanan nga magamit sa emerhensiya.

Dugang ni Magpale nga nadugay-dugay ang paghatag sa mga sakyanan tungod kay nadugay usab ang proseso sa bidding.

Ang hepe sa Provincial General Services Office (PGSO), Jone Siegfred Sepe, niawhag sa kabarangayan ug mga munisipyo nga nakadawat kaniadto og mga sakyanan i-report ang nangaguba na aron madeklarar nga “unserviceable” na ug dili na magamit.

Mahimo usab mohangyo sa Kapitolyo sa pagpaayo sa sakyanan aron dili makagasto ang barangay ug munisipyo. – /GMR) (BANAT NEWS)