PNoy ngadto ni Binay: Ayaw pamakak sa katawhan
CEBU, Philippines – Gidepensahan ni Presidente Benigno Aquino III kagahapon ang iyang State of the Nation Address (SONA) sa miaging semana gikan sa pagsaway sa gihimong counter-SONA ni Bise Presidente Jejomar Binay kagahapon sa hapon.
Sa report sa Philstar.Com, si Aquino namahayag niini atol sa pakighinabi kaniya sa mga tigbalita didto sa Bureau of Internal Revenue (BIR) compound sa Quezon City.
Matud pa sa pangulo tinuod lamang nga SONA ang iyang gipaabot sa katawhang Filipino ilabi na sa iyang ikaunom ug kataposang SONA.
"Walang akong tradisyon o record na nagsisinungaling kanino man. I stand by what we said," pasabot pang Aquino.
Hinuon giangkon ni Aquino nga ang iyang mga kritiko sama ni Binay adunay kagawasan sa pagpadayag kung unsay iyang gustong ipadayag.
Apan gipasidan-an niya si Binay nga dili sultihan og mga bakak ang publiko.
"One would hope that he would honor his pledge to serve the people, and part of that is giving them the right information," pasabot pa sa pangulo.
Si Binay sa iyang counter-SONA kagahapon miatake sa administrasyong Aquino ug mitawag niini nga way pagbati sa katawhan, hinay moaksyon sa yangungo sa mga tawo ug dili angayan sa pwesto.
Iyaha usab gisaway ug giatake ang kabahin sa Bangsamoro Basic Law nga giduso sa administrasyon, gisaway usab niya kun nganong wala hisgoti ni Aquino sa iyang SONA ang PNP-SAF 44, ang pork barrel ug uban pa.
Gipakagamay lang hinuon ni Aquino ang counter-SONA ni Binay kay matud pa niya daghang positibong reaksyon siyang nadawat bahin sa iyang kataposang SONA gikan sa kabataan ug mga katiguwangan.
Tungod niini, nalipay siyang bisan ang mga ordinaryong katawhan niila sa paningkamot sa gobiyerno.
"Nakakatuwa. nakakadagdag engganyo sa aming lahat na dito, sa pagtatapos ng ating termino, may nag-aacknowledge ng ating paghihirap at ang napala ng lahat ng paghihirap natin," pasabot pa sa pangulo sa maong report. (Gikan sa Wires/EIM)
- Latest
