2 patay, 1 kritikal sa pagpamusil

CEBU, Philippines – Tulo ka kaso sa pagpamusil ang nahitabo sa managlahi nga lugar sa dakbayan sa Sugbo niadto’ng Domingo sa gabii.

Una’ng pagpamusil nahitabo alas 7:30 sa gabii sa may Lower Sto. Niño, Inayawan.

Ang biktima naila nga si Jomar Romarate, 24-anyos, adunay kapuyo ug taga lungsod sa Malabuyoc samtang ang suspek mao si Mario Sipalay, 26-anyos, ulitawo ug usa ka caretaker sa video games.

Matud ni Senior Police Officer 2 Romel Bangcog nga hubog nga nisulod ang suspek sa computeran ug sa wala’y daghang estorya kalit gipusil si Romarate igo sa ulo ug sa lawas.

Ang mga sakop sa Inayawan Rescue Unit (IRU) ang suway pa unta nga nitabang sa biktima apan patay na kini diha’ng sila naabot sa mao’ng dapit.

Si Bancog niingon nga lagmit ang gikasuko sa suspek nga wala kini tagai og kwarta sa biktima diha’ng nangayo.

Kaso’ng murder ang ipasaka sa kapolisan batok ni Sipalay nga padayun pa nga gipangita human nisibat.

Pasado alas otso sa gabii laing kaso sa pagpamusil sa may Unit 3 Carbon Market diin patay diha-diha ang usa ka Romeo Ceniza, 31-anyos, taga sitio Camansi, Lorega kinsa naglakaw diha’ng kalit gipusil sa wala mailhi’ng suspek.

Matud ni Bancog nga mismo ang manghud sa biktima nga si Raymund, 25, ang nitug-an nga hilabtanon og mga butang sa merkado ang iya’ng maguwang.

Nagtuo si Bangcog nga lagmit igo lang gibaslan si Ceniza sa mga nahimo.

Samtang kritikal usab ang kahimtang ni Jayson Congee, ulitawo, merchandiser, nga taga dakbayan sa Lapu-Lapu human gipusil alas 2 pasado sa kadlawon.

Padayun pa nga gisusi sa kapolisan ang mao’ng sunod-sunod nga pagpamusil. – /GMR) (BANAT NEWS)