Konsehal Archival mobatok ni VM Labella

CEBU, Philippines – Si Konsehal Nestor Archival Sr. hayan maoy padaganon sa Bando Osmeña Pundok Kauswagan (BOPK) aron isangka kang Vice Mayor Edgardo Labella sa eleksyon sa dakbayan sa Sugbo sunod tuig.

Bisan si kanhi bise mayor Joy Augustus Young miangkon nga gihisgotan nila ang mao nga posibilidad ug andam siya nga mosunod kun unsa ang kabubut-on sa ilang grupo.

Si Archival miingon nga ang iyang ngalan naapil sa “short list” sa BOPK alang sa pagka bise mayor. Si kanhi kongresista Tomas R. Osmeña nga lider sa BOPK miangkon usab nga posible’ng si Archival ang ilang isangka kang Labella.

Suod sila si Archival ug Labella mao nga ang bise mayor naglaum nga dili unta mausab ang ilang pagtinagdanay kun mahinayon nga mag-atbang sila’ng duha pagdagan sa susama nga puwesto.

Gipilde ni Labella si Young sa 184 botos lang sa eleksyon kaniadtong 2013, apan si Young miingon nga maminaw siya sa iyang mga kauban og unsay puwesto nga iyang daganan.

May mitug-an nga si Young modagan na lang pagka konsehal sa dakbayan sa Sugbo diha sa north district ug gihulagway nga sigurado siya nga modaog.

Wala’y igo nga rason nga gihatag ang BOPK kun ngano nga dili man hugot ang ilang baruganan nga si Young ang ilang isangka ni Labella.

Samtang si Osmeña mitataw na g’yud nga siya, ug dili ang iyang asawa nga si Konsehal Margot Osmeña, maoy makigsangka ni Mayor Michael Rama sa eleksyon pagka mayor.

Matud ni Osmeña nga dili niya hatagan og problema ang iyang asawa ug siya maoy makigsangka pagbalik kang Rama. Gipilde ni Rama si Osmeña pagka mayor pinaagi sa kapin sa 6,000 botos nga labaw.

Gipahibalo ni Rama nga mag-tandem gihapon sila si Labella pagdagan sa labing taas nga elective position dinhi sa dakbayan. (BANAT NEWS)