Ironman triathletes nangaangol

CEBU, Philippines – Haom kaayo ang bansag sa international sporting event nga Cobra Ironman 70.3 Philippines tungod kay dili basta-basta ang kalidad ug kalibre sa mga atletang mosalmot niini nga gihimo kagahapon nga nanukad sa dakbayan sa Lapu-Lapu padung sa Mandaue, Cebu ug Talisay City, tungod kay pipila ka mga atleta ang nangaangol sa tinguhang makadaog.

Sa dakbayan sa Lapu-Lapu, tulo ka bikers ang nangaangol naglakip kang Samuel Wai nga taga Hong Kong human kini nasaliring ug nakaangkon og injury sa iyang abaga diha sa Brgy. Mactan samtang nagdulhog gikan sa Marcelo Fernan Bridge, si Wai gidala sa tambalanan.

Laing biker usab ang nakaangkon og ginagmay nga pangos dihang natumba samtang nagdulhog sa mao gihapong taytayan.

Samtang usa ka tawo ang nadasmagan sa biker diha sa Plaridel Street sa Mandaue City  sumala pa ni Glenn Antigua, ang hepe sa Traffic Enforcement Agency of Mandaue  (TEAM). Si Chief Frank Brazil sa City Traffic Management Systems nagkanayon nga nakasinati og ginagmay nga problema sa traffic sa dalan padung sa airport tungod sa maong kalihokan apan nasulbad usab dayon human gihimong alternatibong dalan ang Sangi, Matumbo road sa Pajo.

Samtang duha ka mga langyaw’ng triathletes ang nalandig sa Talisay City District Hospital human naangol samtang nagduwa kagahapon.

Si Rare Banque, ang emergency room nurse sa TDH mibutyag nga usa ka Japanese athlete ang naaksidente sa cycling event diha sa Cebu South Coastal Road sa Talisay City area.

Matud pang Banque kalit lang nisaliring ang maong langyaw ug wala siya’y nakabanggaanay nga laing atleta atol sa pagkahitabo. Ang cycling usa sa tulo ka event sa triathlon nga naglakip sa swimming ug running.

Matud pang Banque ang maong Japanese national gidala sa mga Ironman medics human nahatagan og pasiunang pagtambal sa hospital medical personnel , apan gihulagway hinuon nga di seryoso ang iyang pagkaangol.

Samtang usa usab ka Bahraini athlete ang gidala gihapon sa maong tambalanan dihang kini nireklamo nga nairita iyang mata samtang kini nagbisekleta.

Matud pa niini, nihalang ang iyang mata human sa iyang pag-apil sa swimming event. Gikan sa TCDH, gibalhin siya ngadto sa Cebu Doctors University Hospital.

Wala’y nasugatang dagkong kakulian sa kadalanan sa dakbayan sa Mandaue atol sa pagpahigayon sa maong lumba kagahapon.

Ang mga dalan sa Mandaue City ngadto sa Cebu City lahos sa Talisay City maoy venue sa cycling event sa Ironman 2015.

Si Dino Bargamento sa Command Center sa dakbayan sa Mandaue miingon nga alas- 4 pa ang takna sa kaadlawon daan nang gi-deploy ang mga traffic enforcers sa dalan Plaridel sa Barangay Alang-Alang ug lahos na ngadto sa Ouano Avenue sa Reclamation Area nga maoy agian  sa mga atleta.

Aduna hinuoy natala nga ginagmay nga aksidente sa mga atleta tungod sa pagkalamba diha sa reclamation area ug sa atubangan sa Cebu International Convention Center tungod sa pagkab-ot sa atleta sa bottle water sa water station.

Laing atletang babaye ang gidala sa Mandaue City Hospital tungod sa pagsuka ug pagsakit sa tiyan pag-abot diha sa dalan Plaridel.

Giablihan pagbalik ang maong mga dalan alang sa mga motorist human nakalabay tanan ang mga atleta pasado alas-12 na sa udto.

Samtang walay natalang nadisgrasya sa rota sa Ironman dinhi sa Sugbo sumala pa ni Atty. Rey Gealon, ang bag-ong pangulo sa Cebu City Traffic Office (kanhi CITOM).

Matud niya wala’y kalabutan ang mga natalang disgrasya sa kadalanan sa dakbayan sa Sugbo kagahapon sa kalihukan tungod kay nahitabo kini layo sa rota. – Romeo T. Limpangog ug Rowena Capistrano/EIM) (BANAT NEWS)