Plano sa paggamit sa Barili Church Plaza
CEBU, Philippines - Angay’ng himoan og comprehensive plan ang paggamit sa plaza sa simbahan sa Sta. Ana Parish sa lungsod sa Barili human kini nabutang sa kontrobersiya kay gihimo nga “pay parking” atol sa ilang pagsaulog sa pista.
Si Rev. Fr. Brian Brigoli, ang pangulo sa Archdiocese Commission for the Cultural Heritage of the Church, maoy gitahasan ni Archbishop Jose Palma nga mohimo’g pakisusi sa kasungian.
Matud sa pari nga naresolbar na nila ang maong kontrobersiya atol sa ilang tigum kauban ang mga sakop sa heritage group kay temporaryo lang ang maong paggamit sa plaza isip pay parking atol sa pista.
Sumala pa ni Fr. Brigoli nga mohimo sila og laing tigum aron tukion ang paghimo og comprehensive plan nga subay sa mga guidelines sa heritage nga maglakip na sa mga stakeholders, sama sa nagdonar sa yuta.
Wala pa hinuon sila’y gikatakda nga petsa sa ilang tigum, apan nahatagan na nila og katin-awan ang walay maayo nga pagsinabtanay human sa una nga panagtagbo.
Ang mga parokyano sa Sta. Ana Parish sa Barili miprotesta sa plano ni Msgr. Rolando Jimenez nga himuon nga pay parking ang ilang church plaza kay wala na kini masubay sa katuyoan sa pagdonar sa luna.
Ang grupo nga "Mga apo ni Santa Ana" nisumiter og manifesto ngadto sa buhatan ni Msgr. Brigoli nga nagpadayag sa ilang pagbabag sa plano sa padre kura. (BANAT NEWS)
- Latest
