Problema sa city jail gitagad na sa warden
CEBU, Philippines - Ang bag-ong warden sa Cebu City Jail male dormitory nga si Jail Superintendent Jessie Calumpang nangangkon nga bisan bag-o pa siya nga milingkod sa katungdanan apan 70 porsiyento na nga nabalik niya ang kahapsay ug kalinaw sa maong pasilidad.
Si Calumpang miingon nga adunay 2,575 ka binilanggo ang anaa sa city jail pagka karon.
Ang Cebu City Jail gihimo lang alang sa 1,500 ka binilanggo mao nga magkagubot ang mga karaan ug bag-o nga sakop sa Batang Cebu 45, ang kahugpongan sa mga piniriso.
Si Calumpang mipatawag sa kadagkoan sa mga binilanggo aron maestoryahan ang problema sa mga binilanggo.
Atol sa tigum gipahimangnoan ni Calumpang ang mga lider sa binilanggo nga dili siya gusto og mga binuang sama sa pagpalusot og mga kontrabando apil ang cellphones ug armas nga makapatay.
Gipasidan-an ni Calumpang ang mga jail officers nga dili g’yud pugngan ang mga binilanggo kun aduna sila’y tuyo kaniya kabahin sa ilang mga problema.
Ang city jail wala na usab karon nagproblema sa supply sa tambal kay abunda sila niini nga magamit sa mga piniriso kun sila manginahanglan.
Samtang gipadayag na usab ni Calumpang ngadto ni Mayor Michael Rama ang hangyo nga magpatabang aron unta mapadak-an ang city jail kay nagkadaghan gayud ang mga binilanggo. (BANAT NEWS)
- Latest
