Hikog sa billboard tukion

CEBU, Philippines - Nangita og paagi ang mga sakop sa Outdoor Advertising Association of the Philippines nga dili na mahitabo ang pagkatkat sa ila’ng mga billboards sa mga tawo nga wala sa maayo’ng panghunahuna.

Gipatawag sa Police Coordinating and Advisory Council ang grupo human sa duha ka sunod-sunod nga insidente sa pagkatkat sa tawo sa billboards sa dakbayan sa Sugbo.

Matud ni Mary Anne Solomon, adviser sa grupo, nga lisud kung tangtangan sa agianan ang tower tungod kay maglisud usab ang ila’ng mga sakop sa pagtaud ug paghipos sa tarpaulins.

Gipasabot ni Solomon nga tagsaon ra nga may mokatkat sa billboards ug dili mahimo nga isakripisyo nila ang kalig-on tungod lang sa pipila ka tawo nga gusto’ng maghikog.

Dugang ni Solomon nga bisan unsa ang ila’ng buhaton nga pamaagi kung ang usa ka tawo ganahan maghikog, mangita gyud kini og mga pamaagi. (BANAT NEWS)