Sunog sa airport terminal di na mahitabo
CEBU, Philippines - Gipaneguro sa tagdumala sa Mactan-Cebu International Airport nga dili na masubli ang nahitabo’ng sunog sa usa ka bahin sa terminal sa niagi’ng adlaw.
Human sa mao’ng sunog, ang aircon na lang sa International Pre-Departure Terminal ang dili operational.
Ang kadagkuan sa MCIA ug GMR-Megawide Corp. nihimo na sa tanang precautionary measures aron dili na masubli ang hitabo.
Giklaro sa GMR-Megawide Corp. nga electrical panel board ang nakasinati og short circuit ug dili ang air handling unit sukwahi sa una nila’ng pamahayag.
Dili moabot sa usa ka milyon ka pesos ang danyos sa kabtangan nga nadaut.
Gawas sa GMR-Megawide, lakip ang tagdumala sa MCIA ang nihimo sa imbestigasyon ug ila’ng gipasalig nga dili na mahitabo pag-usab.
Gitug-an ni Estee Plunket, corporate communications officer sa GMR-Megawide Corp., nga lima ka domestic flights ug usa ka international flight paingon sa Kuala Lumpur, Malaysia ang nalangan sa biyahe tungod sa insidente.
Hinuon nakabalik ra ang tanan sa normal nga operasyon gawas lang sa aircon sa International Pre-Departure Terminal diin gigamitan una og dagku’ng electric fan aron dili alimuot sa mga pasahero. (BANAT NEWS)
- Latest
