Sikyu naigo sa kilat patay
CEBU, Philippines - Patay diha-diha dayon ang usa ka guwardiya atol sa pagbunok sa ulan kagahapon sa hapon human kini naigo sa kilat sulod sa kubol-kubol nga iyang gipuy-an sa Sitio Tower Tugasan, Barangay Guadalupe ning dakbayan sa Sugbo pasado alas 4 sa hapon.
Ang biktima naila nga si Jemie Canumay, 32, taga Guihulngan, Negros Occidental ug sakop sa Pioneer Security Agency nga nagtrabaho sa Banilad ug temporaryo nga nagpuyo sa maong dapit kauban ang iyang usa ka igsuon.
Matud pa ni Police Officer 1 Reoful Adalim, imbestigador sa homicide section sa Cebu City Police Office nga nahinabi sa Banat News posibleng gidakop sa kilat ang antenna sa ilang radio (handheld radio) ug mikatay ang kuryente sa ubos sa balay ug naigo ang biktima.
Sumala pa ni Adalim nga lagmit kay basa ang lawas sa biktima sa ulan tungod nga padung na kining mag-ilis dihang naigo sa kilat ilang payag.
Si Mario Flores silingan sa biktima sulay pa unta pagtabang sa biktima human kini nakabantay nga nag-aso na ang gipuy-an ni Canumay human sa pagbuto sa kilat apan nakita na lang niini ang guwardiya nga nahagba na sa salog.
Sulod sa gipuy-an sa biktima nakita ang nangaguba ug nangaputol ang linya sa mga wire sa ilang radio.
Si Canumay ang ikaduha nga napatay sa kilat niining bulana, apan ikaduha usab sa naigo og kilat diha sa maong barangay. (BANAT NEWS)
- Latest
