Mga kapitan gi-briefing sa APEC
CEBU, Philippines - Gipaubos sa briefing sa Department of Interior and Local Government kabahin sa umaabot Asia-Pacific Economic Cooperation (APEC) ang mga barangay kapitan sa dakbayan sa Lapu-Lapu kagahapon.
Si DILG-7 assistant regional director Elias Fernandez Jr. nipasabot nga ang mga barangay tanod kinahanglan isip force multipliers sa seguridad sa usa ka lugar nga suruyon sa kabanay ug pamilya sa mga delegado sa APEC.
Gawas sa seguridad, nagkanayun si Fernandez nga gi-briefing sad nila ang mga kapitan sa community relations ug ang pagtabang sa pagpanindot sa dagan sa trapiko nga agian sa mga delegado gikan sa lain-laing nasud.
Gi-orient sab sa DILG-7 ang posible’ng pagtumaw sa protest actions kung ipahigayun ang APEC meetings ilabi na ang emergency preparedness kung may natural ug human disaster nga mahitabo.
Sa laing bahin si Kapitan Joseph Pangatungan sa barangay Maribago nagkanayun nga sagad sa hotels ug resorts ilabi na ang mga restaurants ang anaa sa iya’ng barangay.
Andam na sila mo-initiate sa paghatag og seguridad tungod sa mga nagkalain-laing langyaw nga modagsa sa lugar.
"Amo na gi-reinforce ang security dinha sa corner sa Maribago, sa may J-Park kay kadaghanan didto kay mga turista. Ako sad sila giingnan kung unsa ka importante ang APEC para sa ato’ng ekonomiya," dugang ni Pangatungan.
Ang DILG-7 nagkanayun nga ang Lapu-Lapu ang ulahi’ng siyudad nga gihatagan og APEC briefing human sa pag-orient sa Cebu ug Mandaue City. (BANAT NEWS)
- Latest
