Soccer instructor konbikto sa murder
CEBU, Philippines - Gikonbikto sa korte ang kanhi soccer instructor sa international school ug kauban niini sa pagpatay sa tag-iya sa art shop ug duha ang nasamdan.
Matud ni Judge Soliver Peras nga nakakita siya og igo’ng basehan sa pagkonbikto ni Jesus Singson, Jr. ug Aristotle Aves sa kaso’ng murder ug duha ka frustrated murder.
Si Liezel Presbitero, asawa sa namatay nga si Higinio niingon nga niadto’ng Septiyembre 21, 2007 sa alas 11:40 sa gabii samtang sila nag-inom gawas sa ila’ng shop sa dalan D. Jakosalem, dakbayan sa Sugbo, kauban sa ila’ng silingan, kalit lang may namusil.
Naigo sa dughan ang iya’ng bana hinungdan nga namatay samtang sila si Benjamin Dilao Jr. ug Angelito Reyes Sr. napusilan sa suwang, kamot ug buko-buko. Ang mga akusado gihukman nga mabilanggo sa pagkapriso og 20 ngadto sa 40 ka tuig ug pabayron og P125 mil ngadto sa pamilya ni Higinio isip danyos.
Laing 16 ngadto sa 34 ka tuig ang gisentensiya sa mga akusado sa duha ka kaso’ng frustrated murder ug pabayron sila og P310,000 isip danyos ngadto ni Dilao ug Reyes. (BANAT NEWS)
- Latest
