Boring nag-wild

CEBU, Philippines - Nakamugna og kagubot sa dalan D. Jakosalem ug Colon ang usa ka babaye nga niliab sa usa ka lalaki tungod kay wala nidayun og pakighilawas kaniya kagahapon sa hapon.

Nahingangha ang mga estudyante ug mga mamalitay sa usa ka mall human sa eksina sa  babaye ug lalaki.

Matud sa babaye nga nasugatan niya ang lalaki sa eskina Colon ug Pelaez ug giagda nga mang-chicks ug nitangdo ang lalaki.

“Nangutana siya pila, niingon ko P300 nya ang bayad sa kwarto P50 pero pag-abot namo sa lodge niatras man siya,” matud sa babaye nga nagpangusmo sa kalagot.

Gidala sa babaye ang lalaki sa usa ka lodge duol sa Parian apan niatras ang lalaki ug iya’ng gigukod ug gikuptan ang liogan sa senina kay naningil sa bayad bisan wa madayun ang ila’ng sabot.

Gitapok-an sa mga tawo ang duha ug tayming kay naabot ang usa ka polis nga nibadlong kanila.

Hugot nga gihimakak sa lalaki nga niabot sila sa lodge ug matud pa niya nga didto lang sila nagbarug-barug sa eskina ug padulong pa lang unta sila magsabot sa pagtagay sa kalipay apan wala nadayun.

Nahibulong na lang siya ngano’ng gigunitan siya ug nag-wild ang babaye.

Dad-on unta sila sa polis apan wala nikuyog ang babaye ug niingon nga mag “quits” na lang sila.

“Ang ako sir magpabayad lang ko’s kahago didto baya ko nagbarug sa may Oriente nya naabot mi diri, pero di na lang ko, iyaha na lang na iya’ng kwarta. Wa pa sad na siya maayo dah,” matud sa babaye. (BANAT NEWS)