Political dynasty angay klaruhon

CEBU, Philippines - Uyon si Gobernador Hilario Davide III sa pagpasar og anti-dynasty law apan kinahangla’ng klaruhon kini sa pagpasabot sa Kongreso.

Matud ni Davide nga dunay mga kongresista nga ang mga pamilya naglingkod usab og posisyon sa gobiyerno o napiling mga opisyal.

Gipasabot niya nga dunay opisyal nga maayo og performance sa iyang serbisyo ug nakahatag kini og kaayohan sa ilang lungsod o siyudad ug di kalikayan nga dunay sakop sa pamilya niini ilaha usab pakandidatohon sa eleksyon.

Nagtuo hinuon si Davide nga ang mga botante g’yud maoy angayan nga mohukom niini kung angay bang botaran ang kadugo sa usa ka political clan.

Buot usab ni Davide nga klaruhon kun unsa kaduol sa pagka-paryente maisip nga kadugo sa politiko. Sama kang Davide, si Kongresista Gerald Anthony “Samsam”Gullas sa unang distrito sa probinsiya buot maklaro ang anti-political dynasty bill. Sa iyang bahin, si Bise Gob. Agnes Magpale nabalaka nga tungod unya sa maong balaudnon  maanugon ang mga talento sa mga sakop sa maayong pamilya sa mga politiko.

Samtang si Bokal Peter John Calderon sa iyang bahin, nagkanayon nga uyon siya sa maong balaod aron usab nga mahatagan og kahigayonan ang uba’ng gusto nga moserbisyo apan kinahanglang klaruhon unsa g’yuy kahulogan sa dinastiya. (BANAT NEWS)