Prisohan sa Cebu City gipasidunggan
CEBU, Philippines - Usa ka Misa Pasalamat ang gipahigayon kagahapon sa buntag sulod sa Cebu City Jail Female Dormitory tungod sa pagkapili sa maong pasilidad isip City Jail of the Year 2015 sa tibuok rehiyon.
Gipangulohan ni Fr. Lukas Ajawona, SVD ang Santos nga Misa nga gitambongan sa mga opisyal sa city jail gipangulohan ni Jailwarden Jail Senior Inspector Stephanny Sotero ug sa mga inmates.
Gisunod gilayon ang pagpasalamat ug paghatag og mga pasidungog sa mga gitawag nilang service providers o nagkadaiyang organisasyon nga nitabang sa operasyon sa pasilidad maong hapsay ug limpyo ang lugar ug napasidunggan tungod niini.
Matud pa ni Sotero, nakuha nila ang maong pasidungog gumikan sa pagtinabangay nilang tanan, gikan sa management staff, service provider ug lakip sa mga inmates.
Sumala pa ni Sotero, duna silay daghan mga activity nga maghatag og higayon sa mga inmate nga molambo bisan og naa sila sa prisohan.
Dunay livelihood programs nga sarang makatabang sa inmates ug skills training nga sarang magamit sa mga priso sa higayon nga sila mogawas sa prisohan.
Sa pagkakaron, bugtong problema sa maong pasilidad mao ang kakulang nila sa supply sa tubig.
Matud pa tunga lang sa adlaw adunay agas ilang mga gripo ug kini bahinbahinon sa dul-an 300 ka inmates. Si Vice Mayor Edgardo Labella ang pangulo sa Police Coordinating and Advisory Council, malipayon sa maong pasidungog. (BANAT NEWS)
- Latest
