Airport, rerouting sa APEC andam na

CEBU, Philippines – Andam na ang lounge nga gitukod sa Mactan Cebu International Airport (MCIA) alang sa mga delegado sa Asia-Pacific Economic Cooperation (APEC) Meetings sa Sugbo karong Agosto 22.

Dili mominus 500 ka tawo ang masulod sa mao’ng lounge.

Matud ni Estee Marie Plunket, corporate affairs manager sa GMR-Megawide Cebu Airport Corp., nga sugaton sa "Signature Cebuano Touch of Hospitality" ang mga delegado sa pag-abot sa tugpahanan diin adunay mosugat nga mga Sinulog Dancers.

Nakigtambayayong na sila sa Tourism Office sa dakbayan sa Lapu-Lapu ug sa Department of Tourism.

Gumikan kay commercial flights ang sakyan sa mga delegado, lakip ang mga sibilyan ang makakita sa pasundayag.

Lakip sa giandam ang mga customs ug security, bandwidth sa internet connection, medical doctors ug ambulansiya kung may emerhensiya.

Samtang gitan-aw sa Cebu City Traffic Operations Management nga sirad-an ang mga dalan sa Juan Luna Avenue ug Serging Osmeña Boulevard kun gikinahanglan subay sa ila’ng plano nga re-routing sa mga public utility vehicles atol sa APEC Meetings.

Sigun sa CITOM nga ang Pope John Paul II usa sa mga dalan nga agian sa mga delegado tungod kay natuyukan kini sa mga hotels diin ipahigayun ang mga meetings sama sa Radisson Blu, Cebu Waterfront Hotel, Marco Polo Plaza ug Marriot Hotel. Adunay 65 ka meetings ang ipahigayun nga tambungan sa 3,200 ka delegado.

Samtang gipaluyuhan sa mga drayber sa pangpubliko’ng sakyanan sa dakbayan sa Mandaue ang 60 ka adlaw nga dry-run sa one-way traffic scheme.

Si Romeo Armamento, national vice president sa National Transport-Workers Confederation Union (NCTU), nipadayag nga tinguha sa kagamhanan ang pagpaluag sa kadalanan nga nakahatag kanila og daku’ng epekto sa pagpamasahero.

Si Konsehal Elstone Dabon, chairman sa committee on transportation sa konseho sa dakbayan, nagkanayon nga ang dry-run sa rerouting molungtad sa 60 ka adlaw.

Human sa 60 ka adlaw, ila’ng paabuton ang taho sa Traffic Enforcement Agency of Mandaue (TEAM) ngadto sa Traffic Board alang sa ila’ng rekomendasyon sa pagpalabang og ordinansa. – /GMR) (BANAT NEWS)