Japanese diver namatay
CEBU, Philippines – Usa ka Japanese national ang namatay sa tambalanan human naglisod og ginhawa samtang nag- dive kini sa Isla sa Olango, dakbayan sa Lapu-Lapu.
Giila ni Police Officer 2 Marvin Naraum, imbestigador sa Lapu-Lapu City Police Office -Homicide Section, ang langyaw mao si Kenichi Nakaizumi, 64, usa ka professional dive instructor ug taga Yamaguchi, Japan.
Sa pagkakaron, gikatahong temporaryong nagpuyo si Nakaizumi sa La Place Guesthouse sa Brgy. Maribago.
Base sa pakisusi sa kapolisan, si Nakaizumi nag-dive sa kadagatan sa maong isla sa miaging Lunes, ala una sa hapon kuyog ang higala niini nga si Dino Ompad, operations manager sa Scuba Star nga nagbase sa Sitio Buyong sa maong barangay.
Apan paglabay sa pipila ka oras usa sa mga boatman sa gisakyan nga pumpboat sa duha ang daling mipahibaw ni Ompad nga naglisod og ginhawa si Nakaizumi samtang naglutaw sa dagat.
Daling gidala sa Mactan Doctor's Hospital si Nakaizumi apan gideklarar kini nga dead on-arrival.
Nahibaw-an usab sa kapolisan nga si Nakaizumi nakaagi na og atake sa kasingkasing kaniadto. – /EIM) (BANAT NEWS)
- Latest
