Naigo sa kilat

CEBU, Philippines – Pagbunok sa kusog nga uwan nagdala og panugdog ug kilat dinhi sa Sugbo miresulta sa kamatayon sa usa ka mananagat human naigo sa kilat didto sa baybayon sa Brgy. Maya sa lungsod sa Daanbantayan kagahapon sa hapon.

Ang panugdog ug kilat nakamugna og brownout sa pipila ka mga franchise areas sa Visayan Electric Company (VECO) kagahapon.

Giila sa kapolisan ang namatay nga si Venancio Pepito, 67, Brgy. Maya sa maong lungsod.

Matud pa ni Police Officer 2 Victor Avenido ang desk officer sa Daanbantayan Police nga nahinabi sa Banat News nga kagahapon sa hapon sa wala pa mibundak ang ulan miadto sa baybayon ang biktima kay nanglimpyo kini sa iyang panagatan.

Sumala pa ni Avenido nga katapusang nakita nga buhi ang biktima nga nagkaon og pan sa baybayon apan kalit lang mipaka ang kusog nga kilat ug nakita sa mga residente ang biktima nga nahagba sa balas sa baybayon.

Sigun pa ni Avenido nga sa pagduol sa mga tawo nakita nga gikan sa tiil hangtod ulo naputos og samad-samad ug paso ang lawas ni Pepito ug ang iyang t-shirt ug shorts nga gisuot ang nagisi.

Dali siya nga gidala sa Daanbantayan District Hospital apan gideklara na kini sa doktor nga dead on arrival.

Gipasabot ni Avenido nga atol sa hitabo nagbarog si Pepito sa hawan nga bahin sa baybayon ug posibleng kini maoy gidakop sa kilat.

“Nagkaon pa ‘tawon ni og pan kay wala pa man to’y ulan, unya kalit lang mikilat naigo siya,” matud pa ni Avenido.

Sa laing bahin, kalit nga nawad-an og kuryente ang pipila ka mga konsumidor sa Mandaue ug Cebu City pasado alas-2 kagahapon sa hapon tungatunga sa pagbunok sa uwan, panugdog ug kilat.

Sumala pa sa gipagawas nga pamahayag sa VECO, ang Line 1 awtomatikong niputol sa supply sa kuryente. Ang naapektahan mao ang Lorega San Miguel, Zapatera, Cogon Ramos, Camputhaw, Hipodromo, Capitol Gorordo Ave, J. Osmeña St., Osmeña Blvd., Queens Road, A. Villalon Drive, Cardinal Rosales Ave. Fooda, Redemptorist Church, Perpetual Succor Hospital, Cebu Capitol Commercial Complex ug Royal Concourse.

Samtang naapektahan usab ang Zapatera, Day-as, Cogon Ramos,  Gen. Maxilom Ave., D. Jakosalem St., Osmeña Blvd., Casino Español Cebu, Archbishop Palace ug Sacred Heart Church.

Lakip sa nawad-an og kuryente ang Kamagayan, Parian, T. Padilla, San Antonio  P. del Rosario St., Imus Road ug  Junquera St. ingon man ang  Carreta, Tejero, Mabolo General Maxilom Ave., Hipodromo Oval., MJ. Cuenco Ave., Mactan Road, Carreta Elem. School, Persimmon, Mabolo Elem. School  ug  Mabolo Parish.

Laing nag-trip off mao ang feeder MDW311 nga nagkonektar sa Tipolo, Subangdaku (Mandaue); Mabolo (Cebu City) Lopez Jaena, MC Briones ug C. D. Seno St.

Apil sa nawad-an og kuryente ang Looc, Bakilid, Ibabao, Centro, Ibabao Estancia, Opao, Paknaan, Umapad, Alang-Alang, Guizo, Cambaro (Mandaue) Ouano Ave., ug Plaridel St., P. Burgos St.

Sumala pa sa VECO, usa sa ilang gidudahang hinungdan sa pag-trip off sa maong mga feeders mao ang pagbuto sa pin insulators  tungod sa pag-igo sa kilat.

Hinuon kasagaran sa mga napagngan og kuryente nabalik na ang supply niini samtang duna pay giayo atol ning pagsulat sa balita alas-5 sa hapon kagahapon. (Jojo Ugdol ug report sa The Freeman/EIM) (BANAT NEWS)