CCPO nanghatag og school uniforms

CEBU, Philippines – Human nahatagan og school supplies, nahatagan na usab og school uniforms ang mga bata nga kaniadto libud-suroy sa Mambaling gikan sa Cebu City Police Office sa niagi’ng adlaw.

Ang mao’ng mga bata nga kaniadto makit-an nga magtambay dapit sa overpass sa Mambaling nakaeskwela pinaagi sa Foster Parents Program sa Police Community Relations Branch sa CCPO.

Pagsugod sa klase, adunay 58 ka bata ang nakadawat og school supplies.

Si Superintendent Enrique Belciña, hepe sa PCR sa CCPO, nagkanayon nga nakita nila ang problema nga wala’y ikapalit og uniporme ang mga ginikanan mao nga ila’ng gipalitan.

Apan sa 58 ka bata nga apil sa Foster Parents Program, 35 na lang ang gihatagan og uniporme tungod kay ang uban matud ni Belciña wala nipadayon sa pag-eskwela.

“Unfortunately, wala mipadayon ang uban kay magsige ra og duwa og computer. Nahibaw-an pa gani namo nga gipangbaligya kuno ang mga requirements nga amo’ng gihatag sa ilaha,” sigun ni Belciña.

Si Belciña daan na nipahimangno sa mga bata nga ipadayon gyud ang pag-eskwela aron makadawat sila sa mga benepisyo gikan sa kapolisan.

“Kay unsaon man na nga magsige ta og tabang nila unya wala’y padulngan?” matud ni Belciña.

Apan bisan pa man og wala na nieskwela ang ubang bata, si Belciña nagkanayon nga padayon gihapon ang ila’ng pag-agni niini nga mobalik pag-eskwela sa sunod abli sa klase.

Matud niya nga gipaapil gihapon niya kini nga mga bata sa mga kalihukan ubos sa mao nga programa aron dili mahilayo kanila nga mga polis. Matag Sabado, matud ni Belciña nga ang mao’ng programa mopahigayon og training sa bisan unsa nga klase sa sports sa gym sa Sawang Calero diin ang mga bata makapili kung unsa nga klase nga paugnat sa kusog ang ila’ng apilan.

“Amo gihapon sila gipaapil matag Sabado para dili sad sila mahilayo namo unya gina-convince gihapon namo sila nga mobalik og eskwela next school year. Dili gihapon namo sila i-disown,” sigun ni Belciña. – /GMR) (BANAT NEWS)