34 nasikop sa drug den
CEBU, Philippines – Nasikop sa kapulisan sa dakbayan sa Toledo ang 34 ka mga tawo sulod sa usa ka drug den atol sa gipahigayong anti-illegal drugs operation sa Sitio Maraat Daku, Brgy. Matab-ang sa maong dakbayan.
Ang panimalay gipanag-iya sa usa ka Bem Tago Carillo, 34, taga Pook Oriental, Tubigon, Bohol apan kasamtangang nagpuyo sa nahisgutang lugar.
Kadaghanan sa mga nadakpan pulos taga Balamban, aduna say taga Asturias ug Tuboran. Lakip sa nadakpan ang usa ka 17 anyos nga batang lalaki nga taga Balamban.
Matud sa kapulisan sa Toledo, nakadawat sila og impormasyon nga adunay daghang tawo sulod sa giingong drug den hinungdan nga gisusi kini sa grupo ni Supt. Ali Baron, hepe sa kapulisan sa Toledo ug kauban ang mga sakop sa Special Weapons And Tactics o SWAT team.
Nakuha gikan sa dinakpan ang daghang drug sniffing paraphernalia sama sa tin foil ug lighter nga gituohang gamit sa pagsuyop og shabu.
Sa laing bahin, mokabat sa P50 mil nga kantidad sa shabu ang nasakmit sa gipasanginlang drug pusher diha sa Brgy. Looc, dakbayan sa Mandaue sa buy bust operation Sabado sa gabii.
Si Police Officer 2 Jesson Flores sa Presinto 1 sa Mandaue City Police Office (MCPO) miila sa nadakpan nga mao si Jovy Mandawe, 50, taga Sitio San Roque sa maong barangay. Gawas sa usa ka paketeng shabu nga ilang napalit sa kantidad nga P200, dugang lima ka dagkong paketeng shabu ug ang marked money ang narekober gikan sa suspek.
Samtang sa operasyon sa kapolisan sa Liloan, nadakpan sila si Cliford Pepito, 19, ug Emmanuel Legaspi, 48, pulos taga Tayud sa maong lungsod human sila nasakmitan og usa ka dakong putos sa pinaugang dahon sa marijuana. – /EIM) (BANAT NEWS)
- Latest
