Kap Navarro may lista sa drug pushers

CEBU, Philippines - Gipangunayan ni Punta Princesa barangay kapitan Jose Navarro ang paghatag ngadto sa kapolisan sa listahan sa mga tawo nga nalambigit sa ilegal nga drugas sa ila’ng lugar. Kini ang gibutyag sa hepe sa Punta Princesa Police Station, Senior Inspector Percibal Miasco, kinsa nakadayeg sa gihimo sa kapitan.

Tinguha ni Navarro nga madeklarar nga drug free ug mahibalik ang pagka Peaceful and Orderly ang iya’ng barangay.

Matud ni Navarro nga kanunay niya’ng gipahimangnoan ang tanan niya’ng empleyado lakip ang kapolisan nga dili makiglambigit sa kalihukan sa ilegal ug motaho kung duna sila’y nahibaw-an. Gawas sa listahan, sumala pa ni Navarro kompleto sa detalye ug sketch sa lugar ang anaa kaniya.

Nanghinaut si Navarro nga magpabilin si Miasco isip hepe sa kapolisan sa iya’ng barangay tungod kay subsob nga nipahigayun sa iyang kampanya batok ilegal.  Si Miasco nipadayag nga andam siya kanunay nga mosuporta sa plano sa kapitan.

Dili pa hinuon siya makahatag og tukma nga adlaw pero ila’ng paningkamutan sa umaabot nga panahon mapapas gyud ang ilegal nga drugas sa lugar. (Rowena D. Capistrano/GMR)(BANAT NEWS)