Tomas, taga pepang midangop sa korte

CEBU, Philippines - Subli’ng giawhag ni kanhi mayor Tomas Osmeña ang korte nga dili idayun ang pagdemolis sa mga nagpuyo sulod sa Osmeña Mausoleum Property kon ang Doña Pepang Cemetery.

Si Osmeña kauban sa 40 ka pamilya niduso og urgent omnibus motion for reconsideration human gibasura ang nahauna nila’ng petisyon.

Si Osmeña nagkanayon nga may katungod siya nga mosang-at sa petisyon kay ang luna iya sa iya’ng amahan ug nakasabot siya sa sentimento sa mga residente.

Matud sa 40 ka pamilya nga gitagaan sila og Notice to Vacate ni Raquel Bohol-Arce, hepe sa Cebu City Prevention Restoration Beautification Enhancement (PROBE) nga wala’y igo’ng rason.

Si Atty. Benjamin Militar, abogado ni Osmeña ug sa apektado’ng pamilya, niingon nga ang pagdemolis nga wala’y relocation site kalapasan sa balaud.

Ang petisyon ni Osmeña ug kaubanan husayon sa sala ni Regional Trial Court Judge Alexander Acosta karong Lunes.

Samtang gihimakak sa hepe sa Department for the Welfare of the Urban Poor ang pasangil nga iya’ng gibaharan ang mga residente sa Doña Pepang nga dili na hatagan og relokasyon kung mokiha.

Matud ni Atty. Collin Rosell nga ipaubos pa nila sa screening aron masuta kun kinsa ang kwalipikado sa socialized housing program.

Hatagan sa kagamhanan sa dakbayan sa Sugbo ang matag pamilya og housing materials ug plete sa pagbalhin. Napili sa kagamhanan nga relocation site ang kasikbit nga barangay sa Lorega-San Miguel. (Mylen P. Manto ug Sheriza Mae R. Uy)(BANAT NEWS)