Tulo ka foreign bikers nadasmagan

CEBU, Philippines - Nalandig sa tambalanan ang tulo ka mga langyaw human giharos sa usa ka KIA utility vehicle samtang sila nagparada sa ilang tagsa-tagsa ka motorsiklo daplin sa dalan sa Barangay Cantabaco dakbayan sa Toledo pasado alas 12 sa nakalabay nga udto.

Ang mga biktima naila nga sila si Hendrikus Joannes Van Maris, 64, Dutch national nagpuyo sa dakbayan sa Lapu-Lapu, James William King, 67, American national,  taga lungsod sa Cordova ug Espen Kloften, 41, Norwegian national nga nagpuyo sa dakbayan sa Lapu-Lapu.

Samtang ang drayber sa KIA utility vehicle mao si Salvador Lorica, 44,  taga Poog dakbayan sa Toledo nga agricultural technician sa City Agricultural Services sa maong siyudad.

Sa imbestigasyon sa Toledo Police nga gipangulohan ni Senior Police Officer 2 Thule Tahanlangit ug mga kaubanan nasayran nga gikan sa City Agriculture Office si Salvador apan pag-abot sa maong lugar nawad-an kini og kontrol sa sakyanan ug  nabanggaan ang tulo ka mga motorsiklo nga nakaparada daplin sa dalan diin usab naglingkod ang mga langyaw.

Mga bun-og sa lawas ang naangkon sa tulo ug daling gidala sa Carmen Copper Hospital sa DAS dakbayan sa Toledo. Apan si Van Maris ang gibalhin sa Chong Hua Hospital tungod kay nagrabehan  apan silang tanan nakagawas dayon sa tambalanan.

Ang drayber misaad nga mao’y mogasto sa tanan nga danyos sa mga motorsiklo. (Jojo C. Ugdol/EIM)(BANAT NEWS)