Nalumos sa swimming pool kritikal
CEBU, Philippines - Bag-ong nakahuman og training sa swimming talandugon ang kahimtang human gikatahong nalumos sa swimming pool sa Cebu City Sports Complex. Nalandig karon sa usa ka pribadong tambalanan si Tomas Carlos Villanueva III, 27, taga La Paloma Village, Brgy. Tisa ning dakbayan sa Sugbo kinsa nakahuman og summer swimming class niadto pang Mayo 4 ning tuiga.
Matud pa ni Tomas Villanueva Jr., amahan sa biktima mapasalamaton gihapon siya tungod kay bisan og gideklarar iyang anak nga dead on arrival sa pribadong tambalanan, na-revived kini sa mga doktor. Sumala pa ni Villanueva, dili pa hinuon stable ang kinabuhi sa iyang anak ug nanawagan siya nga iampo kini.
Giangkon ni Villanueva nabantayan na niyang daan kaniadto nga daling hangakon ang anak sa dihang nag-martial arts pa kini.
Gihangop hinuon sa pamilya Villanueva ang dinaliang pagtabang sa Manager sa CCSC nga si Ricky Ballesteros nga maoy nangunay pagkuyog kaniya pagdala sa iyang anak sa tambalanan.
Si Ballesteros sa iyang bahin wala magdahom sa gidangatan ni Villanueva tungod kay athletic kini, apan base sa kuha sa cctv camera nga ilang nakuha kauban ang mga ginikanan niini dul-an na kini sa usa ka oras nga naglangoy-langoy sa swimming pool ug kanunay mag-bubbling.
Dali nga gitabang si Villanueva sa mga lifeguards human kini nabantayan nga wala na naglihok sa dihang nag-bubbling. - /EIM (BANAT NEWS)
- Latest
