Belgian envoy nakauyon sa Sugbo
CEBU, Philippines – Nakadayeg ang Belgian Ambassador sa Pilipinas, Roland Van Remortele, sa Sugbo atol sa ikaduha niya’ng pagbisita kagahapon.
Sa iya’ng courtesy call kang Gobernador Hilario Davide III, si Remortele nihisgut sa kalamboan tali sa probinsiya sa Sugbo ug sa Belgium.
Usa sa buot palambuon ni Remortele ang fruit juice sa Sugbo sanglit sagad sa iya’ng nakita sa Manila ang produkto gikan sa Estados Unidos.
Nabantayan usab ni Remortele ang lamian nga dried mangoes sa Sugbo nga wala sa Manila ug nakadala na siya sa Belgium.
Gawas sa mga delicacies, naghisgut usab si Remortele kabahin sa pag-export sa mga furnitures sa Sugbo.
Matud niya nga dunay posibilidad nga ang probinsiya ug Belgium makahimo og kasabutan kabahin sa pag-export og mga produkto subay usab sa Generalized System of Preferences (GSP) diin ang kasagaran nga produkto nga gikan sa Pilipinas pwede na’ng makasulod sa European Union nga wala’y buhis.
Matud ni Remortele nga nabantayan niya sa ubang supermarket sa Belgium nga wala’y Asian Corner o mga produkto nga gikan sa Asya.
Gitandi usab sa Ambassador ang Manila ug Cebu diin gihulagway niya nga ang Manila samok, hugaw ug ang mga tawo pirme’ng nagdali samtang sa Cebu makaginhawa siya tungod kay hapsay, relax, ug maayo ang batasan sa mga tawo hinungdan nga buot siya nga mopuyo og dugay sa Sugbo. – /GMR) (BANAT NEWS)
- Latest
