Lima sikop sa drug bust
CEBU, Philippines – Lima ka mga tawo ang nadakpan ug nasakmita’g pinaketeng shabu nga mikantidad og P130,000 atol sa pagpangronda sa mga sakop sa City Intelligence Branch sa Cebu City Police sa Sitio San Roque, Brgy. Calamba ning dakbayan sa Sugbo.
Ang mga dinakpan naila nga sila si Jerome Binoya, 24, level 3 drug pusher nga mao’y target sa kapulisan ingon man sila si Onel Laurenciana, 27 ug laing tulo ka mga gipasanginlang manuyopay nga sila si Manuel Brillantes, 42, Wesley Ocoy, 43 ug Rogelio Campus, 39.
Matud pa ni Inspector Gomersendo Mandawe ang deputy chief sa CIB nga nahinabi sa Banat News, sagad sa mga kliyente ni Binoya mga drayber sa taxi.
Gikatahong nireklamo ang mga residente kay di na sila makaagi sa dalan duol sa balay ni Binoya kay giparkingan og mga taxi unit sa mga drayber nga nanuyop sa balay ni Binoya.
Nasakmit kaniya ang 15 ka pakete ug duha ka medium size sa gidudahang shabu.
Samtang ang mga sakop sa Regional Public Safety Battalion (RPSB-7) ang misikop sab nila ni Rafael Geolin, 42, ug Jade Perol, 24, pulos taga Barangay Cawayan lungsod sa Dalaguete diha sa checkpoint sa Langtad, lungsod sa Argao tungod sa pagdala og shabu. Nakuha gikan ni Geolin ang 15 ka gagmay nga pakete ug unom ‘sab ka pakete sa gitohoang shabu gikan ni Perol.
Sa laing bahin, usa ka Eugene Edwin Ocoy, taga Brgy. Marigondon, Lapu-Lapu City ang gidakop diha sa police checkpoint General Aviations Road, Basak dakbayan sa Lapu-Lapu sa miaging Martes sa gabii tungod sa pagdala og duha ka medium size packs nga shabu ug mga dahon sa marijuana sa tuong bulsa niini. – /EIM) (BANAT NEWS)
- Latest
