Asa ang emergency exits?
CEBU, Philippines – Dul-an duha ka tuig na ang milabay human mitay-og ang 7.2-magnitude earthquake niadtong 2013 apan ang pagtukod og emergency exits sa mga publikong tunghaan sa siyudad wa gihapon nakompleto.
Hinungdan nga si Mayor Michael Rama mimandu ngadto sa Local School Board nga paspasan ang pagbutang niini. Kini human daw gipahinumdoman sa 4.7 magnitude nga linog ang Central Visayas kagahapon sa buntag.
Si Rama miingon nga angay’ng atimanon na ang mga pultahan ug hagdanan aron pagsiguro nga walay mga bata nga mangahulog panahon nga adunay emerhensya sama sa linog.
Nasayran nga daghang mga eskuylahan sa dakbayan ang kuwang og hagdan ug emergency exits.
Sumala ni LSB chairman Rady Diola nga 25 ka emergency exits ang gipaabot nga mahuman karong Mayo. Duna nay 30 nga nahuman ug dugang 15 ka emergency exits nga mahuman sunod semana.
Atol sa pagtay-og kagahapon, nakita usab sa mayor ang kamahinungdanon sa pagtukod sa bag-ong Cebu City Medical Center.
Ang tambalanan giguba sa niaging tuig human ang edipisyo niini nakaangkon og grabeng kadaot gumikan sa linog niadtong 2013.
“Retrofitting can’t be guarantee for our patients’ safety. It’s better to build a new one instead of having it retrofitted,” sigun sa mayor bahin sa sugyot ni Konsehal Sisinio Andales. – /EIM) (BANAT NEWS)
- Latest
