Biyuda patay, 16-anyos angol sa hit and run

CEBU, Philippines – Patay ang 67-anyos nga biyuda nga biktima sa hit and run ug naangol sab ang 16-anyos nga nagsakay og motorsiklo nga nadasmagan sa barangay Don Gregorio Antigua, lungsod sa Borbon alas 5 pasado sa hapon niadto’ng Domingo.

Si Police Officer 2 Jose Cejano sa Borbon Police Station niila sa namatay nga si Clara Jurado Cacanog ug ang naangol mao si Jimboy Novabos, 16, pulos nagpuyo sa maong dapit.

Matud ni Cejano nga padulong sa amihanang bahin ang Toyota Vios nga sakyanan nga nagdala sa plate number JCW 607 diha’ng nilabang ang biktima ug nadasmagan hinungdan sa pagkalamba sa sementado’ng karsada.

Naigo sab sa sakyanan ang motorsiklo nga giluwanan ni Novabos nga nakaingon sa iya’ng pagkaangol.

Human sa insidente, giingong wala gyud mohunong ang maong sakyanan ug nipabulhot sa pagpadagan padulong sa amihanang bahin sa Sugbo.

Gidala ang duha ka biktima sa Juan Dosado Memorial Hospital apan si Dr. Erwin Susano nideklarar kang Cacanog nga dead on arrival. – /GMR) (BANAT NEWS)