Gang sa DAS, Toledo gikabalak-an

CEBU, Philippines - Gikabalak-an sa mga ginikanan, magtutudlo ug mga opisyal sa barangay Don Andres Soriano, dakbayan sa Toledo ang giingong pagpang-recruit sa usa ka 19-anyos nga  moapil sa gitukod nga gang. Gipugngan lang una ang pangan sa maong estudyante apan nalambigit na kini sa kagubot sa barangay nga nakaapektar na sa ubang estudyante sa Don Andres Soriano National High School.

Una niini ang mao’ng sitwasyon gipadangat sa usa ka concerned citizen sa gipahigayun nga open forum.

Matud ni Jeffrey Lacson, guidance counselor sa DAS National High School nga adunay unom ka estudyante ang ilang gipanid-an nga giingong miyembro sa gitukod nga gang.

Uban niini gikan pa sa elementarya ug high school samtang ang uban mga outsiders nga mga menor de edad. Gipatawag na usab ni Lacson ang mga ginikanan sa ilang mga gidudahan nga mga estudyante aron ma-monitor ug mabadlong sa mga ginikanan.

Giingong magtapok-tapok ang maong mga estudyante ug nakit-an nga may paso sa wala nga bahin sa kamot nga hulma og susama sa butones.

May nahitabo nga riot sa usa ka internet cafe nga gituohang gikalambigitan sa maong grupo.

Giingong mang-bully na usab ang mao’ng grupo sa ubang estudyante hinungdan nga ang ubang estudyante dili na motungha.

Hinuon gi-aksiyonan na sa eskwelahan ang problema ug giabagan na usab kini sa mga opisyal sa barangay sa DAS.

Samtang si Konsehal Marjorie Perales, chairman sa committee on education sa konseho sa dakbayan sa Toledo, ang mohimo usab og lakang alang sa maong mga estudyante. (Raymond Abarcas/GMR)(BANAT NEWS)